Сркески во Корзо

Голманот Христијан Сркески е шестиот нов во третолигашот Корзо. Отстапен е шест месеци од прволигашот 11 Октомври. Надежен чувар е со 19 години, израснат во Победа. Есеноска беше во Силекс. Корзо претходно ги доведе: Велкоски од Големо Коњари, Кондоски и Тодоровски од Преспа, и Дамески од 11 Октомври, а за играч е регистриран и тренерот Горан Тодоровски. Тренинзите се одвиваат на Могила и во фитнес сала. Планирани се серија пријателски до март, кога од првото место на табелата се стартува во Третата лига - Југ.

Асфалт за Штавица

Жителите на на селото Штавица лесно ќе доаѓаат од град дома и уште полесно ќе заминуваат во Прилеп, откако се асфалтира кусиот пристап од околу два километри со поддршка на Владата. За Водици, и министерот за транспорт и врски Миле Јанакиески, со градоначалникот Марјан Ристески, ја пресекоа лентата и симболично го ставија патот во употреба, кој ќе влијае за запирање на миграцијата и за враќање на иселени на родните огништа.

Скулптура од мраз

Секое годишно време има свои добри и лоши страни. Лете  жежи, пот облева, на есен и на пролет врне дожд, се прават калливи патиштата, зиме студи, се лизга... Ама ако на оптимист му дадете лимон, тој од него ќе направи лимонада - вели една поговорка. Се си има своја позитивна страна. Пролетта со цвеќињата, есента со лисјата, летото со кусите ракави, а зимата со снегот. Природата секогаш е најдобар уметник, и не за џабе илјадници туристи одат на Хаваи  да ги видат ерупциите на вулканите, на Исланд за да ги видат ледените санти... А еве и во Прилеп природата направи "мини-чудо". Изваја уметничка скулптура од мраз. Кај паркот до Судот, езерцето во кое се брцкаат пајките, скоро целото замрзнато, има дел каде од водоскокот е направено уметничко дело креирано од студот. Сликата вреди 1000 зборови, па видете ја зимата од призмата на позитивноста.

Повеќе општински пари за култура

Повеќе пари или 13 милиони денари во 2012 година се одделени во општинскиот буџет за културни настани. Најмногу се за Пиво фестот, кој годинава ќе се одржи по 10-ти  јубилеен пат, потоа за карневалот Прочка и за МТФ "Војдан Чернодрински". Нема да бидат заборавени ни фестивалот "Пеце Атанасоски", ликовните колонии, а денари ќе се потрошат и за прославувањето на празниците 11 - ти Октомври, Трети ноември и Свети Никола. Од општината посочуваат дека сé што е во интерес на градот од културен аспект ќе биде финансиски поддржано за презентација на градот како културна и туристичка дестинација.