Прилеп се “сроди” со украински Чернигов

Градоначалникот Марјан Ристески и неговиот колега од украинскиот град Чернигов потпишаа спогодба за збратимување на двата града при посетата на политичко - бизнис делегацијата од Прилеп на Украина. Претседателот на регионалната стопанска комора, Симон Наумоски стави потпис на договор за соработка меѓу стопанските комори на Прилеп и Чернигов. Спогодба за соработка парафираа и претставници на економските факултети од Прилеп и украинскот град со 300 илјади жители. Извршниот директор на Комората, Ристо Најдоски вели дека бизнисмените ќе ја искористат единствената спогодба на Украина со Македонија за слободна трговија. Договорено е да се покрене иницијатива на двете држави за меѓусебно признавање на сертификатите за фито и санитарна инспекција. Се очекува конфекцијата Кули да воспостави соработка за набавка на текстилни материјали за производството и да стане претставник за материјалите на Балканот. Домашните бизнисмени се интересираа за белиот мермер на Мермерскиот комбинат, не само за својот пазар, туку и за Молдавија, Казахстан и Азербеџан. На Витаминка í се отвара можности за воспоставување соработка со договорот за слободна трговија. Деловните луѓе од Чернигов покажаа подготвеност да купуваат тутун од ориентален тип и побарале мостри за проби - вели Најдоски. Делегација ја оствари средбата во соработка со амбасадата на Македонија во Украина и Министерството за надворешни работи.

За Свети Никола

Стопанска банка готви 60 илјади сарми

Овогодишниот домаќин на традицоналната прослава на големата трепеза на плоштадот на празникот Свети Никола, Стопанската банка од Скопје, веќе на големо се подготвува да ги нагости граѓаните. Големата порција од 60 илјади сарми колку нокт ќе се густира со забавувачите под отворено небо Миле Кузманоски и Елена Петреска. Регионалниот директор на Стопанската банка, Стевче Димески, вели дека персоналот на ресторанот Сонце засилен со членови на женските здруженија ќе го приготвуваат гоштевањето. Да се одржи адетот, ќе се сервираат 250 килограми пржени риби, над 200 килограми грав, околу 80 килограми ориз ќе биде завиткан во мали сармички со 1200 килограми расол. Сето тоа ќе се залива со сто литри ракија, два ипол тони вино и неколку стотина литри кисела вода и сокови - вели домаќинот Димески, кој најавува многу гости од земјава, кои се деловни партнери на банката. Дознаваме дека Банката ќе го предаде домаќинлакот на сопственикот на конфекцијата Комфи Ангел, Ирена Јакимоска.