Дружба на ракометните легенди

Некогашните ракометни првотимци на Тутунскиот комбинат, имаа дружба во весело расположение за потсетување на старите добри времиња. Гостин беше соиграчот од пред три децении, велешанецот Никола Бисинов. За убавите спомени зборуваа со часови. Во поранешната втора југословенска лига, Тутунски важеше за силен тим, претендент за врвот. Малку недостасуваше да се најде во елитната конкуренција. Легендите не го одминаа муабетот за потребата од сениорски клуб. На дружбата беа Тошко Арапчески, Гоце Бозароски, Ангеле Гулески, Стеван Николоски, Петар Кузманоски, Влатко Коруноски, а се приклучија и помлади, како Орде Илиоски, Томче Петрески, Петар Велјаноски...

Нема сиџимџии

Поштук фатија ортомџии. Од многуте фамилијарни занаети со ортомите, исчезна пред неколку години и последниот наследник, кој се бореше со времето и се обидуваше да ја одржи семејната традиција со производство на ортоми во дуќанот во пазарот. Занаетотот отиде во “неврат” заедно со добитокот. Малкуте сопственици на стока ги колосуваа коњите, магарињата и кобилите на пасење по селата со други сиџими. Ортомите и јажињата од различни дебелини ретко се произведуваат од коноп. Овој материјал и ортомџискиот марифет ги заменија машините. Наместо конопни влакна, се употребуваат вештачки, синтетички конци. Дури и во бои.

Уловени капиталци

Околу 200 ловџии од “Мукос” уловиле еден волк, една волчица и четири лисици во хајката кај месностите Две Стени и кај селото Присад,   според инструкциите од Агенцијата за ветерина, која предвидува контрола и превенција на беснилото. По анализите на мострите кај волците и лисиците, болеста не е присутна. Сепак секретарот на друштвото Јане Стевананџија предупредува на претпазливост. Ловџиите се надеваат дека ќе ја запазат квотата од 60 заловени лисици до крајот на годинава. Волкот - капиталец бил уловен од умешниот ловџија Здравко Пејкоски, а Љубомир Тасески со снајперска трпеливост ја начекал волчицата на “пусија”.

Итар Пејо со гаќи

За прв пат Пејо ставил гаќи на себе кога решил да се жени. Купил платно, мајка му му сошила гаќи и тргнал право во другото село кај својата свршеница. На пат му се посакало “да се олесни”. Ги слекол белите гаќи и ги обесил на еден трн. Во тој момент видел зајак и потрчал по него, заборавајќи на обесеното на трнот. Кога стигнал кај мајката на свршеницата ја поткренал кошулата и се пофалил: “Погледни бабо, дома имам уште четири метра”. Секако мислел на платно. Бабата се изненадила кога погледнала, а кога слушнала и за четирите метра оставени дома се прекрстила и помолила богу за спас.

ФОТКА НА НЕДЕЛАТА