Втора донаторска за црквата во Точила

Најдоцна по новогодишните празници, ќе се организира втора донаторска конференција да се соберат пари за доизградба на црквата Света Петка во Точила. Ова го најави градоначалникот Марјан Ристески. Локалните власти издвоија милион денари за црквата. Планирано е објектот да биде доведен до карабина до крајот на годинава. Се очекува храмот да биде готов до 19 декември 2012 година. Црквата е посветена на трагичниот настан на Карпалак на 8 август 2001, кога беа убиени 10 резервисти од Прилеп. Темелникот беше поставен на 8 август 2008 година. Свештенството вели дека црквата во Прилеп се гради по стотина години.

Сто години од раѓањето на архиепископот г.г. Ангелариј

Семејството на блаженоупокоениот архиепископот г.г. Ангелариј не може да се помири со загубата, и по 25 години од загинувањето. Ова беше речено на одбележувањето на сто годишнината од неговото раѓање. Архиепископот Ангелариј беше поглавар на МПЦ од 1981 до 1986 година. Беше скромен, достоинствен човек. Го одликуваше упорност во извршувањето на Божјата волја. Со изборот за поглавар, се залагаше за самостојна и независна црква. Говореше дека “не е Балканот тесен, туку се тесни срцата на луѓето” - рече владиката Петар. Синот Драгослав Крстески, на 78 години, рече дека татко му, кој за верниците бил поп Цветко, загинал во 1986 година во сообраќајка на патот Прилеп - Градско. При несреќата, го удри камионче, а од другата страна, камион без кочници. Мистериозно загина, оти и на судењето во Кавадарци, кажаното беше сменето. Неговата смрт беше сомничава и не е расчистена до крај - вели Крстески.

Заминаат две деца од “Ѕуница”

Децата од Дневниот центар “Ѕуница” покажаа што научиле за меѓународниот ден на децата со посебни потреби, 3 декември. Ја отпејаа химната “За овој свет еден и единствен, во кој не треба да има разлики”. Во центарот се згрижуваат 25 деца. Две ќе ја напуштат едукацијата, заради подобрување на психофизичка состојба и успешна социјализација.

Потпор на “Мечкин камен”

Во тек е изградба на потпорен ѕид на ул. ,,Мечкин Камен,, во должина од 70 метри. Од Одделението за урбанизам велат дека ова е уште еден од повеќето потпорни ѕидови како неопходни инфраструктурни зафати пред асфалтирање на една од главните улици во населбата. Дел од ѕидот летово падна со поплавите што го зафатија градот. Општината за изградбата на ѕидот оддели два милиони денари.

Модерен кенеф за пазарџиите

Тоалетите за пазарџиите веќе се ставени во функција во градскиот пазар. Клозетите ги исполнуваат сите санитарни и хигиенски услови. Во простор од 30 квадрати, адаптиран е тоалет и за лица со хендикеп. Одржувачот вели дека уште нема тарифа, ама ако некој има физиолошка потреба и не може да плати, пак ќе може да го користи кенефот.