На јаве каталогот за Музејот за тутун

Каталогот за експонатите на Музејот за тутун, испечатен на македонски и англиски јазик ќе доживее јаве. Во вторник ќе биде промоцијата на трудот на етнологот Александар Цветкоски. На 102 страници, преку збор и фотографии, е раскажана историјата и потеклото на бројните експонати. Интересни се "приказните" за лулињата, табакерите, бурмутиците, шанданите, наргилињата, пепелниците..., меѓу кои и  за единствениот пепелник во светот, "Софиските трудбенички". Музејот располага со збирка од над 3000 експонати, уметнички дела, фотографии, макети на објекти од манипулација со тутун и дел арте предмети од тутун. Етаблиран е како привлечна туристичка дестинација, бидејќи експонатите се историјата на Македонија преку тутунот.

Цеца Видова Трајческа, претседател на Клубот на литературни творци

Виделина на пишаниот збор

"Литературата досега немаше канал, излез да се пренесе сé она што не пече. Новоформираниот Клуб на творци токму тоа ќе им го овозможи на сите што го сакаат пишаниот збор". Вака вели Цеца Видова - Трајческа, претседател на Клубот на литературни творци, преку кој ќе се афирмираат литературата и пишаниот збор, бидејќи клубот е членка на Здружението на литературни клубови на Македонија. Засега членуваат 20 литерати, со тенденција да им се придружат и други творци, оти се отворени за соработка со секој што го сака, негува и почитува  пишаниот збор. Стартот им беше со поетската вечер посветена на Блаже Конески. Предвидени се наградни конкурси, поетски вечери, издавање на алманах, вечери посветени на значајни творци и на лауреати на Струшките вечери на поезијата. Сé што е интересно кај пишаниот збор, да излезе на виделина - додава Трајческа. Цитирајќи го Ацо Шопов, кој рекол:  "Ако  имаш нешто неизречено, нешто што те притиска и пече, закопај го во длабоката тишина, тишината сама ќе го рече",  првиот човек на Клубот најавува акција за почитување на пишаниот збор, литературата, но и на македонскиот јазик.

Слики, инсталции... на ДЛУП

Под мотото "Традицијата е код - традицијата е течение" во среда од 19 часот во галеријата на ЦК "Марко Цепенков" ќе биде отворена годишната изложба на уметници, членови на ДЛУП. На светлост ќе излезат слики, скулптури, инсталации, на кои традиционално или пак модерно се претставени инспирациите на уметниците, кои делата ги доставија на конкурсот што  го објави ДЛУП. Изложуваат Анита Сотироска, Бојана А.Трпческа, Даниела Настоска, Емилија Горгијоска, Васил Костов, Марија Стојаноска, Емил Димоски, Александра Богоеска, Орде Стамболџиоски, Маја Најдоска и Марија Ѓоргијоска од Прилеп, скопјаните Маја Ралева и Мирослав Стојановиќ, како и гостинот - српскиот уметник Горан Остоиќ.

Новогодишен концерт на музичкото училиште

Со изведба на дела од Дебиси, Бах и други автори, учениците од музичкото училиште ќе ја презентираат стекнатата вештина на свирење во текот на годинава на различни инструменти на традиционалниот новогодишен концерт кој ќе се одржи в понеделник во Театарот. Класиката ќе се зачини со "уметнички" третман на свирката на народните инструменти, кои веќе се негуваат во музичкото. Покрај солистите, ќе настапат и оркестарот, хорот и оркестарот на народни инструменти.

НУЦК,, Марко Цепенков,,

Репертоар на театарот

Сабота, 24 декември

19.30

,, Од кол на кол,, режија Коле Ангеловски

Недела, 25 декември

12.00

,,Јунаците од бајките,, режија Петар Димоски

Монодрамата "...Шаторо"  наградена во Корча

Специјална награда за најдобра претстава во целина доби прилепската монодрама "Јас, Илија Димоски - Шаторо" од Петар Петрески во изведба на Трајче Иваноски - Пепио, во режија на Игор Трпче на затворање на 16-тиот Интернационален фестивал на монодрама АЛБА МОНО во Корча - Албанија. Драмата беше независен проект на Театарската работилница - Прилеп. Наградата за најдобар актер отиде во рацете на Јоана Попоска, за изведбата на монодрамата "Љубов моја", во режија на Љупчо Ѓорѓиевски, а во  продукција на Малиот драмски театар од Битола. Награди добија и гостите од Полска и Крагуевац. На еднонеделниот фестивал со дваесетина монодрами учествуваа актери од десетина земји.