Откупот на тутунот станува празник

"Без реакции на тутунарите веќе се откупени околу 20 отсто од годинешниот род на тутунот во земјава главно произведен во прилепско со просечна цена од околу 170 денари. Производителите се задоволни од досегашната проценка на осумте откупни фирми, оти цените се повисоки за околу 20 денари во споредба со лани". Ова го изјави, заменик - министерот за земјоделство Зоран Коњановски во Тутунскиот комбинат, потсетувајќи дека и годинава државата ќе го субвенционира со 60 денари од килограм тутунот тежок 18 илјади тони. Создадена е култура на однесување меѓу тутунарите и откупувачите. Постои меѓусебен респект, не само за откупот, туку и претходно. Средствата се исплаќаат не подолго од 30 дена, согласно договорите - вели Коњаноски. Гоце Трајкоски, тутунар од Прилеп, е задоволен од проценката. Донесов 500 килограми квалитетен тутун кој "помина" во просек од 165 денари. Проценителите се коректни. Го ценеа според мострите. Само, треба да се "качи" третата класа, оти е малку 112 денари. Голема е разликата меѓу првата и третата класа. Реално, родот не треба да биде поефтин од 180 денари од килограм - вели Трајкоски. Не е задоволен од цената на третата класа Данчо Милески, претседателот на здружението на тутунарите. Бараме смена на неколку одредби од законот за да учествуваме во одредувањето на цените на тутунот. Кога ќе се вкрстат трошоците, ќе се добие цена на третата класа од 140 денари. За следната сезона ќе се смени законот и ќе влијаеме на креирањето на цените, заедно со откупувачите и министерството - вели Милески. Во прилепско годинава, околу 12 илјади семејства ќе предадат 14 илјади тони тутун од ориенталниот тип "Прилеп".

Полицијата пак сектор за внатрешни...?

Првиот човек на јавната безбедност на МВР Љупчо Тодоровски ќе побара смена на законот, со кој Прилеп ќе се врати во сектор за внатрешни работи од сегашниот статус на полициска станица во рамките на СВР Битола. Во следните измени на законот, ќе побарам Прилеп да биде сектор за внатрешни работи, бидејќи безбедносната состојба е подобрена. Прилепската полиција е пред останатите градови во поглед на откривање на кривичните дела - изјави Тодоровски на разгледувањето на реновираните простории на полицијата.

СТОПАНСКА БАНКА - СКОПЈЕ - ВО НОВ ОБЈЕКТ

Дирекцијата на Стопанска банка - АД - Скопје заедно со неколкуте шалтери кои се наоѓаа на плочникот, сега се преселени во нов објект наспроти Центарот за култура Марко Цепенков. Отворањето на новите модерни деловни простории беше на верскиот празник Свети Никола, кој е и патрон на Прилеп, а годинава домаќин на празникот беше токму банката. Лентата на новата филијала се пресече во присуство на многуте деловни партнери и гости на свечената церемонија по сите адети. Со новите современи деловни простории како што истакна првиот човек на банката Глигор Бишев, ќе се подобрат условите за контакт во интерес на клиентите.

Пратеник или градоначалник?

На крајот на 2011 година политичките карвани полека се загреваат за локалните избори во 2013 година. Веќе се тера внимателна теренска работа да се собере глас повеќе за својот човек. Додека позицијата нема мака со кадровските решенија, врие опозицискиот табор на СДСМ. Од сите страни "демнат" лобирања, па и шиканирања, и грст политикантства. Сите бијат меѓусебен мегдан за додворување на централните партиски моќници. По се изгледа дека опозиционерите не ќе го менуваат стилот, иако не им беше ефикасен на последните избори. Не е тајна дека ќе одат по испробаниот рецепт од 2011 година. Тоа значи познат кандидат за градоначалник, стар активист и висок функционер. Многу симпатизери и членови на СДСМ, таква креација препознаваат во актуелниот пратеник Горан Сугарески. Иако тој го тера вториот мандат, сепак веројатноста е голема дека ќе биде идниот кандидат за градоначалник. Како и да е, времето ќе покаже, кој колку успеал да ги намести камчињата на свое место во политичкиот мозаик и да стане кандидат за градоначалник.