Радост за сите деца

Децата не се делат по класи. Секое е вредно и единствено - личност со чувства. Сите доживуваат радост, тага, љубов... Позитивните чувства на децата со посебни потреби ги поттикнаа повеќе здруженија, фирми и вообичаено локалните власти. Локалната самоуправа, Прилепската пиварница, Комерцијалната банка, слаткарниците Дизниленд и Алфа со Црвениот крст ги израдуваа со пакетчиња децата во Дневниот центар. Дури и “грубите”, членови од мото клубот Guardian angels, го тргнале намуртениот изглед од лицето и го замениле со насмевка, а нивните срца, “полни со бензин”, ги отвориле и на децата им подариле радости. Хуманоста доаѓа од сите страни, а штитениците возвратиле со песни и игра, заедно со учениците од музичкото училиште. Се трудиме да ги социјализираме децата. Тоа најдобро се прави за празниците. Научени се дека се ближат и го украсуваат Домот. Изработуваат честитки и подготвуваат приредби за хуманите луѓе, кои ги затоплуваат детските срца, ги поттикнуваат да чукаат побрзо, кога некој ќе дојди во посета - изјави директорката на Центарот за социјални работи Снежана Јованоска. Дневниот центар за децата со посебни потреби доби бесплатен интернет и кабелска телевизија од Кабелнет.

Автобус само за лете

Првите автобуси по ослободувањето во 1945 година, кои ги крстареле прашливите патишта во земјава, а ретко и подалеку, останаа само во спомените на патниците и на по некој од преживеаните возачи. Автобусите биле "откриени одавде - онде", да ги пренесуваат луѓето за мака и за арно до Охрид. Зашто, за Скопје и за Битола, функционирала железницата. За другите градови, освен пајтоните, кои ги превезувале малкуте останати потомци на чорбаџиите, се користеле неколку автобуси кои еднаш или двапати неделно возеле доваму-дотаму. Крнтиите оставени од Германците и од Англичаните најчесто се наоѓале од кај јужниот сосед. Со затегенувањето на односите по граѓанската војна во Грција, големите автомобили за превоз по десетина патници, биле носени во градов од Столицата, од Белград, се разбира преку Скопје. Неколкуте во Прилеп биле ветви, небаре камиони, само за летни превози, зашто стаклата биле искршени, а и подовите зјаеле од сите страни. Дури и покривот прокиснувал, оти бил издупчен од рафали. Такви биле времињата на почетоците на автобускиот превоз. Кога Тито се смири со Хрушчов по Инфорбирото на Сталин, стигнале и "подобри" автобуси од руско потекло. Тие барем не протекувале и биле нешто понови од повоените.

ФОТКА НА НЕДЕЛАТА