НАЈДОБАР МУЗЕЈ ВО 2011 ГОДИНА

Наградата е доделена за археолошката поставка и за реконструкцијата и реставрацијата на музејот 11 Октомври

Признание и за кустосот Александар Цветкоски

Заводот и Музеј Прилеп се закити со  наградата Музеј на годината за 2011 година, што за 18 мај - денот на музеите, традиционално ја доделува Македонскиот национален комитет на Меѓународниот совет на музеите. Престижното признание се додели заради остварувањето на значајни проекти, вредни за македонското културно и историско наследство. Наградата отиде во прилепскиот Музеј, бидејќи ја отвори археолошката поставка со вредни артефакти, ископани на бројните локалитети и за реконструкцијата на Музејот 11 Октомври - рече Захаринка Алексоска - Бачева.

Гордана Данилоска - Спироска, директор на Музејот, вели дека наградата е поттик за поголем ангажман за заштита и истражување на културното наследство. Продолжуваме со несмалено темпо во заштитата на вредното наследство - потенцира таа. Награда доби и етнологот Александар Цветкоски, кој е прогласен за најдобар музејски работник за 2011 година. Признанието кај Цветкоски е упатено заради неговиот придонес во изработката на  вредниот каталог на македонски и англиски јазик за поставката на предмети за уживање за тутун од музејот за тутун.

Нов лик за куќата на Бектешовци

“Ќе се реконструира куќата на Бектешовци, градена во 1923 година, со прецизно дефинирана естетика, изградена во духот на граѓанската архитектура, со нагласена раскошност на формите”. Ова го најавија од Музејот, информирајќи дека за скоро време ќе почне реставрацијата на фасадата, балконите, скалите, прозорците и оградата, за што ќе се инвестираат околу три милиони денари.

- Сакаме да ја доловиме автентичноста на куќата, која е една од 16-те,  за кои претстои заштита и обнова- вели Данилоска - Спироска.

И објектот на Катастарот, заштитен со закон ќе добие нов лик.

СЛИКИ ОД ГОРДАНА ТАЛЕВСКА

            Дваесетина слики од уметницата Гордана Талевска се изложени во ЦК “Марко Цепенков”. Дипломираниот сликар од Благоевград, Бугарија, првпат се претставува во Прилеп.

            Имала самостојни изложби во родната Битола, Кавадарци и во Неготино. Била дел од групни изложби. Учествувала на колонии низ Македонија и Бугарија. Работела на конзервацијата и реставрацијата на  Јени џамијата во Битола и на локалитетот Хераклеја... 

Во ЦК “Марко Цепенков”

ФОТОГРАФИИ - “МОЌТА НА БОИТЕ”

“Моќта на боите” е тематската изложба на 19 фотографии на автори, кои го изнесуваат својот критички став кон националниот симбол на Германија. Креациите изложени во салонот на ЦК “Марко Цепенков” се рефлекс на боите на германскиот национален симбол.

- “Моќта на боите - црно-црвено-златно” е извонреден пример за тоа како човек може уметнички - креативно и имагинарно, критички да се однесува со еден национален симбол - вели Гудрун Штајнакер, амбасадор на СР Германија во Македонија.

Изложбата досега е претставена во Шангај, Пекинг, Техеран, Џакарта, Скопје, Атина, Берлин...

АТАНАСОСКИ ВО ЛОНДОН

Со автентично дело “инсталација во бела боја од памук и лискун”,  скулпторот Атанас Атанасоски се претстави на изложбата “ Made in Macedonia ” во Лондон, што беше дел од манифестацијата “Денови на македонската култура”. Атанасоски се чувствува почестен што негово дело го виделе љубителите на уметноста од британската престолнина. Се радува што го претставил специфичниот уметнички израз, базиран на традицијата. Елиза Шулеска, директорка на Музејот за современа ликовна уметност, потенцира дека авторите биле избрани затоа што преку нивното творештво се допирале корените, религијата, традицијата со сенс за автентична ликовна елаборација.